Bosca Ceoil – Féile Sheáin Mhic Pháidín

Boscadóir as Dumha Thuama i nGaeltacht Iorrais i dTuaisceart Mhaigh Eo is ea Fiachna Ó Mongáin. Bronnadh Gradam Ceoil TG4 ar Fhiachna sa bhliain 2007 (Ceoltóir Óg na Bliana) agus bhí tionchar mór ag ceoltóirí ina cheantar féin - cuid atá imithe romhainn agus cuid atá fós ar an bhfód - agus leithéidí Joe Cooley, Tony MacMahon agus Des Mulkere ar a stíl bhoscadóireachta. Tá ceol Fhiachna le cloisteáil ar roinnt taifeadtaí, ina measc an cnuasach “Tunes in the Church”, “Amhráin Iorrais” agus “Ceol Mhaigh Eo”.

Is amhránaí clúiteach agus boscadóir í Mary. Is as Tuar Mhic Éadaigh i nGaeltacht Mhaigh Eo í ó dhúchas, agus tá traidisiún fada ceoil aici le hoidhreacht. Bhí a seanmháthair, Nora Staunton, ar dhuine de na boscadóirí ba mhó a raibh meas uirthi sa cheantar agus bhí éileamh uirthi i gcónaí do na damhsaí tí áitiúla. Fidléir mór le rá ab ea athair Mary - Mattie - agus bíonn a máthair Kathleen, chomh maith le bheith ina hamhránaí breá, ag seinm ar an mbosca ceoil freisin. Ó bhí Mary ina cailín óg bhí sí ag góilín. Agus í ina déagóir, bhíodh Mary ag seinm go rialta le ceoltóir eile as Maigh Eo, John Hoban, agus sna blianta ina dhiaidh sin, sheinn sí le ceoltóirí clúiteacha lena n-áirítear Alec Finn, Steve Cooney agus Frankie Lane.
Seinneann Mary go binn agus go suairc, agus mar a dhéanann a comrádaithe ceoil, Sharon Shannon agus Josephine Marsh, bíonn fonn uirthi poirt neamhghnácha nach gcloistear go rómhinic a roghnú, chomh maith leis na poirt choitianta. Oireann an stíl atá ag Mary go han-mhaith do na poirt shéiseacha seanaimseartha. I measc a rogha foinn nach gcloistear go rómhinic tá an t-aer mall álainn ‘Inis Cara’ agus ríl darb ainm ‘The Hop Down’ a foghlaimíodh ó thaifeadadh a rinne na deirfiúracha as Gaillimh, Sarah agus Rita Keane. D'eisigh Mary a céad albam sa bhliain 1998. Seoladh a dara halbam, Circle of Friends, i gContae na Gaillimhe i mí Iúil 2010. Bíonn Mary ag seinm i seisiúin go rialta i gCinn Mhara agus i gCathair na Mart le Julie Langan.

Is duine de chlann cheolmhar as Béal Easa i gCo. Mhaigh Eo é Tom Doherty. Thosaigh sé ag foghlaim an bhosca ceoil ó Martin Donoghue nuair a bhí sé ceithre bliana d’aois. Bhuaigh Tom a chéad Chomórtas Uile-Éireann ar an gconsairtín. Tá bonn Uile-Éireann aige ar an mileoidean freisin. Ó shin i leith, tá mórán ceoil seinnte ag Tom agus is ceoltóir gairmiúil agus múinteoir ceoil é le fada an lá. Is iomaí camchuairt atá déanta ag Tom in Éirinn, san Eoraip agus i Meiriceá. Tá ceol Tom le cloisteáil ar go leor taifeadtaí teilifíse agus dlúthdhioscaí. Is féidir ceol Tom a aithint de bharr cé chomh hiontach is atá sé go teicniúil agus bíonn dánacht nuálach ag baint lena chuid ceoil i gcónaí. Tá fuinneamh as cuimse, croí agus anam i gceol Tom, ceol a chuireann na ladhra ag damhsa i gcónaí.